2.19.2008

Folk de rebaxes na rede

Nestos tiempos de crisis el mercar música pue convertise nun luxu o nun caprichu caru. Nes más de les tiendes un CD, qu'igual nun ye denguna novedá, anda pelos 18 o 20 €; a eso hai qu'añadir que yá nun hai tiendes de discos fuera de los centros comerciales y que les qu'hai nun ufierten nin los discos que radien les radiofórmules... Alcontrar un discu de folk pue convertise en daqué abegoso.
Gracies a internet tenemos la oportuidá de mercar música folk en tiendes especializaes o direutamente na web del grupu (los grupos del estáu español tienen que ponese les piles n'esta cuestión, porque puen contase colos deos d'una man los qu'ufierten esta posibilidá), defendiéndose col inglés y con una tarxeta de créditu nun hai problema, y anque los gastos d'unvíu xuban un poco'l preciu d'un CD si se merquen un par d'ellos de cada vez nun suelen salir más caros que na FNAC, por exemplu. Pero güei quería falavos d'otra posibilidá más económica y llegal (el que quiera tirar de la mula que tire, pero equí falamos de mercar música). El casu ye que n'Ebay podemos alcontrar delles tiendes de discos con catálogos decentes de música folk y con precios bien interesantes, igual nun vamos encontrar la cabera novedá d'esta o aquella banda pero de xuru qu'alcontramos dalguna ganga qu'apurrir a la nuesa coleición. Como exemplu sirvan los dos CDs que veis xunto a estes llínies, Boneshaker de Cantrip y Fortune's Road de Back Of The Moon, dos trabayos reientes (ún de 2005 y l'otru de 2003) de dos de les bandes más interesantes de la penúltima fornada del folk escocés por 10 libres esterlines (unos 15€). Bien baratu y lo dicho, una opción pa controlar gastos ensin tener que dexar de mercar música folk.

2 comentarios:

Dangerous Piper dijo...

Bono primeru, pa que nun heba malos entendidos, "tirar de la mula" ye perfeutamente llegal (drechu de copia privada). Y en cuanto a que los grupos españoles nun venden los discos na web, quiciabes tenga que ver les trabes de la famosa LSSI, anque ye verdá que con un pocu d'interés podien facelo, la llexislación nun facilita les coses.

Folkesí dijo...

Nun digo que la mula sea illegal, "el que quiera tirar de la mula que tire, pero equí falamos de mercar música" son les palabres esautes que remano pa dicir que toi falando de "mercar" música y non d'otra mena d'intercambios.