Girl Of The Whistle

Depués de dellos díes ensin actualizar el blog güei faigolo con una entrada que namái encartia tanxencialmente cola tema del blog.
Tuve dellos díes nos que la galbana y les noticies non mui interesantes nel mundiu del folk fixeron que nun m'asomara per esta ventana. Diéronse los premios AMAS, con Anabel Santiago como gran triunfadora no que cinca a la música tradicional, pero éstos son unos premios que nun soi mui bien a comprender dende la primer edición y por munches razones (yá había un anuariu de la música enantes qu'esti, nun sé quién noma los candidatos nin conozo los sos criterios, hai un premiu al meyor instrumentista nel que nun hubo dengún gaiteru nomináu, hai un premiu al meyor gaiteru promesa -esti añu taba Rubén Alba de candidatu nesa categoría!!-...), debe ser que soi mui repunante...
A lo que diba, la entrada de güei, la principal razón pa tar allonáu d'internet foi esta mozina tocando la xiblata, una de les illustraciones dedicaes a la música folk que yá anuncié dende esti blog hai unes selmanes. Naguo por que vos preste.

Música n'illustraciones

La mio otra gran afición amás de la música folk, más o menos céltica, ye'l debuxar arte celta. Llevo dellos meses ensin tomar los llapiceros y parezme que va siendo hora de facer daqué, porque la práutica nesta actividá ye primordial, como na música.
Hai cuasi un añu fixi, por encargu, la illustración que veis xunto a estes lletres. En febreru o marzu púnxose en contautu comigo Antón García, de Trabe, pa entrugame si podía facer daqué pa la portada d'ún de los fascículos de la coleición qu'asoleyó La Voz de Asturias sobre la música asturiana. El resultáu yá lo veis, dalgún yá lo vería xunto col periódicu nel so día, un triskel formáu por tres músicos tradicionales.
El casu ye que toi por retomar la temática y facer una serie d'illustraciones celtes dedicaes a la música folk, anguañu nun ye un estilu mui popular pero nos 80 yera corriente alcontrar carátules de discos y cartelos de conciertos bien guapos fechos nesti estilu... Lo que vaya saliendo yá lo diréis viendo equí y si daquien quier aportar dalguna idega, tendráse en cuenta.