Agora tamos en http://masquegaites.blogspot.com

Folkesí camuda de cabecera

2008-06-30T11:24:00.005+02:00

Depués de 6 meses asoleyando noticies y bilordios del folk asturianu, del cantábricu y del folk celta en xeneral baxo la cabecera Folkesí, Músiques con Raigañu veome obligáu a camudar el nome del blog pol nuevu Más que Gaites.
Está fin de selmana recibí un email de Luís Martín, portavoz de la empresa Folkesí S.L., onde m'esplicaba que dende va años está entidá vien trabayando alrodiu de la música tradicional en Segovia. Asina, entamen el prestixosu festival folk de Segovia, representen a dellos grupos y asoleyen la revista Folkesí. La esistencia d'un blog tamién col mesmu nome y tamién dedicáu a la música tradicional podía provocar confusiones. Cuando entame a publicar esti blog nun tenía más interés qu'echar la llingua a pacer y da-y continuidá a una actividá que venía faciendo tamién dende tiempu atrás na web asturcelta.com, un hobby como cualisquier otru, nun se me pasó pel maxín intentar sacar dengún beneficiu comercial d'esta xera nin perxudicar a denguna empresa que trabaye en y pola música tradicional.
El siguiente pasu a dar taba ñidio y nun ye otru que migrar el blog a una nueva cuenta que va tener por títulu Más que Gaites y que vais poder atopar na URL http://masquegaites.blogspot.com
Nes prósimes selmanes el blog siguirá abiertu pa que podáis atopar con facilidá la nueva ubicación pero, pasáu un tiempu prudencial dexaré namái un enllaz a la web www.folkesi.com que ye la de la empresa de Luís Martín.
Gracies
Vítor González

2008-06-27T12:00:00.005+02:00

2008-06-23T12:25:00.005+02:00

2008-06-16T18:50:00.005+02:00

2008-06-11T12:04:00.004+02:00

2008-05-22T18:58:00.004+02:00

2008-05-19T12:35:00.006+02:00

Cantabria Infinita

2008-04-29T12:33:00.003+02:00

Depués de falar del FIA y de la necesidá de que les alministraciones públiques s'impliquen más allá de la concesión de premios, chamos la vista a Cantabria que lleva apostando dellos años polos festivales de folk como forma promoción turística.
L'exemplu paradigmáticu d'esi apueste ye'l festival Cantabria Infinita (el mesmu lema de la promoción turística cántabra), que vien cellebrándose dende hai un par d'años en San Vicente, nel qu'axunten nun mesu escenariu a bandes de la tierruca con grupos con nomes de rellumbrón (Chieftains, Dervish, Sharon Shannon, Carlos Núñez...). Na edición d'esti añu van tar presentes los nuesos paisanos Corquiéu, delles bandes cántabres onde rescampla la nueva formación Braña y como cabeces de cartelu Kepa Junkera, la Oyster Band y Moving Hearts que tres de tocar en Santiago va poco va dar un segundo conciertu nel estáu español, cuasi dexuru'l caberu, ufriendo una oportunidá d'oro a los que nun pudimos desplazanos a Santiago.
Igual el cartelu del añu pasáu yera más espectacular y atractivu pa los aficionaos asturianos, porque a Kepa yá lo conocemos perbién y la Oyster ye un bon grupu de direutu pero igual nun ye de los que mueve muncha xente, pero la presencia de Moving Hearts xustifica ella sola el pasar una fin de selmana en San Vicente.

L'Intercélticu declaráu Fiesta d'Interés Turísticu

2008-04-29T11:14:00.004+02:00

El Festival Intercélticu d'Avilés recibe un premiu más nos sos 12 años de vida, siendo declaráu Fiesta d'Interés Turísticu. El xuráu que concede estes distinciones rescampla la gran proyeición internacional del festival avilesín y la gran promoción que-y da a la ciudá y a Asturies nel Arcu Atlánticu, amás del so valir artísticu y etnocultural.
Dende Folkesí préstame mandar una felicitación a tola xente d'Esbardu y a Xuan Casas pola distinción, naguo por qu'esti premiu faiga que les dixebraes alministraciones públiques s'impliquen de verdá nel sofitu del Festival, qu'esti premiu nun quede n'otra palmadina nel llombu.
Nestos 12 años el FIA vien siendo la másima espresión de la cultura celta en xeneral y en particular de la música tradicional nel estáu español, y esto foi posible non gracies a la Conseyería nin al Ayuntamientu d'Avilés sinon al esfuerzu de la xente d'Esbardu y al pueblu d'Avilés qu'acueye tolos años a los invitaos con precuru. Llega la hora de colgase medalles, esperemos nun remembra-y a naide la feria de la maxa que-y encargaren a un tal Paco pa cargase'l FIA.

Felpeyu presenta "Canteros"

2008-04-12T16:25:00.003+02:00

Llegó l'intre que tábemos esperando, pol que naguamos bien de tiempu: Felpeyu presenta'l so nuevu trabayu discográficu Canteros.
Una de les meyores bandes de folk del estáu reñaz depués de pasar por ún de los trances más murnios pelos que se pue pasar, la perda de dos grandes músicos, de dos grandes collacios. Ye hora de certificar la nueva estaya na vida de los felpeyos con un esperáu discu del que yá pudimos sentir daqué nos sos caberos conciertos, na radio o en Folkenlared.com
Esta mañana merqué dos entraes nel serviciu Tiquetexpress de Caxastur y pudi decatame de qu'entá quedaben por vender unes 200, cuasi toes nel entresuelu. Naguo por poder disfrutar d'un bon conciertu güei n'Uviéu y naguo por poder ver el Filarmónica llen a mamplén de siguidores y amigos d'esta gran banda, asina que, yá sabéis, los que nun tengáis entrada yá tais tardando en dir mercala. ¡Vamos entamar una bona folixa!

Cornemuses d'Europe et Méditerranée

2008-04-04T11:11:00.004+02:00

Güei apurrimos a esta seición un muséu sobre les cornemuses d'Europa, el MuCEM Muséu de les civilizaciones mediterránees, que cunta con un apartáu dedicáu a les gaites del vieyu continente perinteresante.
Ente les coses bones d'esti muséu ye que podemos visitalu ensin salir de casa, con dir a la so web http://www.cornemuses.culture.fr podemos disfrutar d'una guapa esperiencia porque la web ta perbién diseñada y los conteníos, amás, son ablucantes. Ente otres coses pue vese una impresionante coleición de gaites, postalines y semeyes antigues de gaiteros... hasta una semeya de Santi Caleya!
Lo dicho, pa nun perdese.

Rock'n'Gaita

2008-03-23T12:19:00.002+01:00

Equí vos presento una pequeña esbilla d'exemplos grupos de rock qu'añaden una o más gaites a la clásica formacón guitarra+baxu+batería. Nun va ser too grupos de folk y bandes de gaites.

San Patriciu

2008-03-18T01:45:00.001+01:00

Esti añu cayó de llunes y hubo que trabayar... equí vos dexo una tontura qu'alcontré en YouTube

Yá hai cartelu pa la Folixa na Primavera

2008-03-16T11:54:00.003+01:00

Tan acabantes d'espublizase, na prensa'l país, los nomes de les bandes de folk que participarán na presente edición de la Folixa na Primavera de Mieres, asina, esti añu podremos ver pela cuenca minera a Dervish, a la Michael McGoldrick Band xunto a los asturianos Felpeyu y La Bandina. Nomes de rellumbrón pa una edición que barruntamos pue ser de les meyores cellebraes na historia de la Folixa.
El vienres, 18 d'abril, va toca-ys subir al escenariu a La Bandina y a los de Michael McGoldrick, mientres, el sábadu 19, sedrán Felpeyu y los eurovisivos Dervish los protagonistes del certame.

Girl Of The Whistle

2008-03-06T10:43:00.004+01:00

Depués de dellos díes ensin actualizar el blog güei faigolo con una entrada que namái encartia tanxencialmente cola tema del blog.
Tuve dellos díes nos que la galbana y les noticies non mui interesantes nel mundiu del folk fixeron que nun m'asomara per esta ventana. Diéronse los premios AMAS, con Anabel Santiago como gran triunfadora no que cinca a la música tradicional, pero éstos son unos premios que nun soi mui bien a comprender dende la primer edición y por munches razones (yá había un anuariu de la música enantes qu'esti, nun sé quién noma los candidatos nin conozo los sos criterios, hai un premiu al meyor instrumentista nel que nun hubo dengún gaiteru nomináu, hai un premiu al meyor gaiteru promesa -esti añu taba Rubén Alba de candidatu nesa categoría!!-...), debe ser que soi mui repunante...
A lo que diba, la entrada de güei, la principal razón pa tar allonáu d'internet foi esta mozina tocando la xiblata, una de les illustraciones dedicaes a la música folk que yá anuncié dende esti blog hai unes selmanes. Naguo por que vos preste.

Nosh de Dulcamara: meyor cantar n'asturianu

2008-02-22T11:00:00.003+01:00

El cantar Nosh de Dulcamara algama'l premiu al meyor cantar n'asturianu de la Conseyería de Cultura na so segunda edición. El grupu de pandereteres que vién d'estrenar va poco'l so primer trabayu discográficu fizose ayeri, 21 de febreru, colos 1000€ del premiu nuna gala que se cellebró na Casa Cultura Teodoro Cuesta de Mieres.
Xunto a Dulcamara foron finalistes del premiu Esther Fonseca, Skanda, Soncai Sound System y Anabel Santiago, toos ellos actuaron na gala amás de Nuberu.
Dende equí da-ys a les moces de Dulcamara la norabona pol premiu. Per otru llau, entrugar si daquién conoz los criterios que faen qu'un cantar seya nomináu o non a estos premios, camiento que la lletra del mesmu sedrá'l más importante, por eso nun soi quién a entender como llegó ser finalista'l cantar de Skanda, que tien nel so discu polo menos 2 muncho meyores qu'esti de les caracoles que foi finalista...

Folk de rebaxes na rede

2008-02-19T15:48:00.004+01:00

Nestos tiempos de crisis el mercar música pue convertise nun luxu o nun caprichu caru. Nes más de les tiendes un CD, qu'igual nun ye denguna novedá, anda pelos 18 o 20 €; a eso hai qu'añadir que yá nun hai tiendes de discos fuera de los centros comerciales y que les qu'hai nun ufierten nin los discos que radien les radiofórmules... Alcontrar un discu de folk pue convertise en daqué abegoso.
Gracies a internet tenemos la oportuidá de mercar música folk en tiendes especializaes o direutamente na web del grupu (los grupos del estáu español tienen que ponese les piles n'esta cuestión, porque puen contase colos deos d'una man los qu'ufierten esta posibilidá), defendiéndose col inglés y con una tarxeta de créditu nun hai problema, y anque los gastos d'unvíu xuban un poco'l preciu d'un CD si se merquen un par d'ellos de cada vez nun suelen salir más caros que na FNAC, por exemplu. Pero güei quería falavos d'otra posibilidá más económica y llegal (el que quiera tirar de la mula que tire, pero equí falamos de mercar música). El casu ye que n'Ebay podemos alcontrar delles tiendes de discos con catálogos decentes de música folk y con precios bien interesantes, igual nun vamos encontrar la cabera novedá d'esta o aquella banda pero de xuru qu'alcontramos dalguna ganga qu'apurrir a la nuesa coleición. Como exemplu sirvan los dos CDs que veis xunto a estes llínies, Boneshaker de Cantrip y Fortune's Road de Back Of The Moon, dos trabayos reientes (ún de 2005 y l'otru de 2003) de dos de les bandes más interesantes de la penúltima fornada del folk escocés por 10 libres esterlines (unos 15€). Bien baratu y lo dicho, una opción pa controlar gastos ensin tener que dexar de mercar música folk.

Nueva ayalga de les Trasatlantic Sessions 2

2008-02-06T11:22:00.000+01:00

Iain MacDonald, Donal Shaw, Jerry Douglas, Ricky Skaggs, Tommy Hayes, Russ Barenberg y Danny Thompson protagonicen esti nuevu video de les Trasatlantic Sessions 2 onde interpreten un tema tituláu Puirt a Beul. Poco más hai que dicir, disfrutar con estos grandes músicos ye abondo.

Verdasca: Folk From Asturies

2008-02-03T12:42:00.000+01:00

Verdasca ye una de les más firmes promeses del folk asturianu d'anguaño.
Con malapenes un par d'años de vida como grupu, y con una edá media de los componentes que nun llega a los 20 años, recibieron un gran espaldarazu mediáticu tres el so paso pel Festival Intercélticu de Lorient, onde algamaron un meritoriu segundo puestu nel concursu de grupos mozos y, amás, la so gaitera Andrea Joglar foi denomada como la nueva Carlos Núñez pola prensa francesa tres protagonizar un duetu con la bretona Marie Le Cam nuna de les nueches máxiques del festival.
El grupu ta formáu por: la mencionada Andrea Joglar a la gaita; el so hermanu Rodrigo al curdión diatónicu; Marina Pangua ye la vocalista; Sara Fernández encargase de les percusiones; y Llorián Flórez del vigulín.
La maqueta presenta 4 temes del so repertoriu, que tamién podéis oyir nel so MySpace, y podéis mercala en dellos chigres folkis del país por 6 €. A ellos, en direutu, podréis velos nel Café Trisquel de Xixón el 21 d'esti mes.

Concursu de cartelos del Festival d'Ortigueira

2008-01-30T17:26:00.000+01:00

El Festival d'Ortigueira convoca, por segundo añu, un concursu pa elexir el cartelu oficial del certame. La iniciativa ta abierta a empreses de diseñu y al público en xeneral, siendo la temática y les téuniques llibres. El premiu ye bien interesante, 6000€ dirán parar al bolsu l'autor del trabayu escoyíu pol xuráu del concursu, nel que tarán presentes dos artistes de reconocíu prestixu.
El plazu pala entrega de los cartelos sedrá del 24 de marzu al 4 de abril.
A ver si gracies al concursu disfrutamos d'un cartelu más guapu que na edición de 2007, que podéis ver xunto estes llínies y que nun yera gran cosa... na humilde opinión del qu'escribe estes lletres. Tolos interesaos en probar les vueses dotes artístiques podéis alcontrar más info na web del Festival.

V Festival Tierradura Folk (Cantabria)

2008-01-24T13:10:00.000+01:00

Yá van sabiéndose cosines del que promete ser ún de los festivales más interesantes d'entamu d'añu na vecina Cantabria, asina, nel pueblu de Secadura acaben de presentar el cartelu de la presente edición que va celebrase los díes 21 y 22 de marzu.
Los grupos qu'actuarán el 21, estos son: p'abrir boca'l grupu ganador del concursu folk Escenariu Prau (qu'entá ta por fallase); los nuesos paisanos de Dixebra y pa finar los irlandeses Dave Munnelly Band, qu'igual nun son un grupu perconocíu pero poles referencies que tenemos d'ellos van dar la campanada.
Pa'l 22 queden: una de les bandes más interesantes de Cantabria anguaño, Garma; un garapieyu de los meyores gaiteros de toa Europa, José Manuel Tejedor, Jarlath Henderson, Fred Morrison, Patrick Molard y Anxo Lorenzo; y los occitanos Lou Dalfin pa finar la folixa.
En resume un festivalón pa entamar el añu folki.

Música n'illustraciones

2008-01-20T18:47:00.000+01:00

La mio otra gran afición amás de la música folk, más o menos céltica, ye'l debuxar arte celta. Llevo dellos meses ensin tomar los llapiceros y parezme que va siendo hora de facer daqué, porque la práutica nesta actividá ye primordial, como na música.
Hai cuasi un añu fixi, por encargu, la illustración que veis xunto a estes lletres. En febreru o marzu púnxose en contautu comigo Antón García, de Trabe, pa entrugame si podía facer daqué pa la portada d'ún de los fascículos de la coleición qu'asoleyó La Voz de Asturias sobre la música asturiana. El resultáu yá lo veis, dalgún yá lo vería xunto col periódicu nel so día, un triskel formáu por tres músicos tradicionales.
El casu ye que toi por retomar la temática y facer una serie d'illustraciones celtes dedicaes a la música folk, anguañu nun ye un estilu mui popular pero nos 80 yera corriente alcontrar carátules de discos y cartelos de conciertos bien guapos fechos nesti estilu... Lo que vaya saliendo yá lo diréis viendo equí y si daquien quier aportar dalguna idega, tendráse en cuenta.

Lasairfhíona: Flame of Wine

2008-01-17T18:10:00.001+01:00

Segundo trabayu discográficu de Lasairfhíona Ní Chonaola, cantante d'Innishere, nes isles d'Aran, tituláu cola torna del so nome al inglés Flame of Wine.
Igual l'estilu de cantu sean-nós nun seya la parte más popular ente nós del folclor irlandés pero, dacuando, xurden voces nesi estilu cola capacidá de cautivar a cualisquier oyíu sollerte que-ys preste daqué d'atención. De casualidá alcontré'l MySpace d'esta moza tres d'una tarde pasando d'un grupu a otru siguiendo los enllaces de collacios qu'ufierten nos sos respeutivos espacios. Dempués d'escuchar un par de los temes que tienen ellí colgaos, la siguiente parada del viaxe virtual foi la web de la tienda de Claddagh Records.
En Flame of Wine alcontramos 14 cortes (12 n'irlandés y 2 n'inglés), onde fai gala d'un estilu de cantu mui enraigonáu na tradición pero al que ye quien a aportar un estilu mui personal. El discu ta producíu por Máire Breatnach y, ente los músicos que collaboren na parte instrumental, ta xente tan renomada como Mary Bergin a los whistles o Johnny MacDonagh al bodhrán.

L'otru conciertu d'Añu Nuevu

2008-01-13T19:07:00.000+01:00

Sesión improvisada nun pasillu, con xente como Phil Cunnigham, Jarlath Henderson o John McUsker. Impagable'l ver a estos músicos tiraos pel suelu tocando como llocos.

GAITA GLOBALIZADA: RIGA

2008-01-13T18:44:00.000+01:00

Nel nuesu viaxar pel mundu, visitando países onde alcontramos una gaita asturiana, güei aportamos a Riga (Letonia)

RED HOT CHILLI PIPERS: BAGROCK TO THE MASSES

2008-01-10T11:46:00.000+01:00

Segundo trabayu discográficu de los Chilli, agora yá con dellos premios na faltriquera (When Will I Be Famous de la BBC1 y al meyor direutu del 2007 nos Scots Trad Music Awards).
En Bagrock To The Masses alcontramos básicamente'l repertoriu que la banda ufiertó nel pasáu Intercélticu d'Avilés (pel que volverán pasar esti 2008 los díes 18 y 19 de xunetu), versiones de clásicos del rock (de Voodoo Child a We Will Rock You, pasando per Hey Jude o Smoke On The Water) entemecíos con dalguna melodía tradicional tamién perconocía (The Clumsy Lover, The Mason's Apron...).
El típicu discu que-y ponemos al collaciu que nun-y gusta la música folk pa que flipe como suena un tema d' AC/DC a la gaita escocesa. Ésa ye la principal virtú'l discu, la curiosidá de sentir a la gaita temes perconocíos de la cultura pop, igual músicos del talentu de los qu'alcontramos equí merecíen empreses más ambicioses en qu'emplegalu, pero nun engañen a naide y los sos conciertos son bien prestosos. En xunetu volveremos velos.

Blima: Entamu

2008-01-06T11:46:00.000+01:00

Discu debú del cuartetu Blima (Fernando Oyagüez, Xurde Fernández, Marcos G. Alonso y Silvia Quesada) del que nun sé si seré a facer una reseña mui oxetiva, porque ye ún de los mios grupos favoritos d'anguaño, el títulu elexíu pa'l so primer discu nun pue ser más afitáu Entamu.
Blima ye otru exemplu del denomáu folk de cámara que tan bonos grupos ta dando al folk asturianu nos caberos años (Tuenda, DRD, Dual...), nel casu de Blima alcontramos a dos virtuosos a cargu de los instrumentos melódicos, Xurde a les flautes y Marcos al curdión, bien secundaos por Fernando al bouzouki y Silvia a les voces.
Nel discu alcontráis música folk acústica, d'estilu clásicu diz la so discográfica y interpretación perfecha, la más de composición propia anque tamién hai pieces tradicionales. Con un soníu mui cercanu al direutu d'un grupu que ta mui avezáu al escenariu, esti cuartetu fartóse a tocar enantes de metese grabar lo que ye siempre d'agradecer.
Na mio opinión el meyor discu asturianu del 2007, si hai que pone-y una pega dicir que la carpeta'l discu nun ye mui guapa na mio opinión

Curdiones

2007-12-30T02:30:00.000+01:00

Pasada la broma obligada del 28 d'Avientu, volvemos a falar en serio de la música folk d'equí y d'otros llaos, que nun somos escrupulosos cola bona música.
Esta vuelta volvemos ufiertar otra perla de les qu'atopamos en YouTube, un perinteresante documentu coles curdiones como protagonistes: de botones, pianu y concertina. Una pasada

Un gaiteru asturianu pa los Tannies!

2007-12-28T10:48:00.000+01:00

Énte la marcha del gaiteru titular de la banda, Colin Melville, los Tannahill Weavers faen una apuesta que va dar muncho que falar n'Escocia y tamién equí, n'Asturies, porque ye un grupu perapreciáu equí y porque'l sustitutu de Colin Melville va ser asturianu. L'elexíu ye Flavio Benito direutor de la Banda de Gaites La Raitana, a quien los Tannies conocen perbien de la so etapa como gaiteru de Llan de Cubel.

La idega surdió va poco, durante la reciente visita del grupu escocés a Asturies pa participar nel Castaña Folk de Les Arriondes. La rellación del grupu col folk asturianu bien de lloñe y la incorporación d'un gaiteru asturianu ye un pequeñu homenax a la música del norte peninsular que siempre los acueye perbién, yá seya n'Asturies, en Cantabria o en Galiza, nun hai más que ver la semeya qu'abre la so páxina web. De toes formes esti ye un cambiu mui radical pa un símbolu de la música tradicional escocesa, asina que, primero van facer una incorporación a prueba, Flavio pel momento namái va participar na xira española de branu pa testar la reaición del público y l'adautación de la gaita asturiana al repertoriu escocés. Si toos queden contentos cola prueba l'asturianu pasaríe a ser el gaiteru titular de la banda, si non, quedaríe como una guapa esperiencia.

Naguando pol nuevu discu de Felpeyu

2007-12-27T11:53:00.000+01:00

Albidro que, como yo, tará muncha más xente, esperando por tener nes manes el nuevu trabayu discográficu de Felpeyu.
Pa los que nun puedan aguantar equí va un video d'una actuación d'esti gran grupu nel Hotel la Marquesita n'Os Ozcos.

Gaita Globalizada: Bruseles

2007-12-26T18:28:00.000+01:00

Esta vuelta son los rapazos de la Banda Villa de Xixón los que lleven hasta Bruseles les gaites asturianes.

Gala de la Canción Asturiana

2007-12-24T09:35:00.001+01:00

Ayeri, 23 d'Avientu, retresmitióse en direuto pola TPA la Gala de la Canción Asturiana. El programa tuvo presentáu por Sonia Fidalgo y Xosé Ambás, la llingua remanada nel espaciu foi la llingua asturiana.
Albidro que debió tener un share abondo bueno, como suel pasar con otros programes dedicaos a la música tradicional y col asturianu como llingua vehicular. El que l'audencia-y de'l preste a espacios d'esta mena nun ye garantía pa que la TPA siga enfotándose nellos, Camín Cantares nun tien asegurada la so continuidá, pero polo menos faenos saber que sí esiste interés ente'l público asturiano pola cultura tradicional y que la llingua que dellos denomen "inventada" nun supón denguna torga.
Darréu podéis ver dellos videos de la gala xubíos a la rede por Alborecer

2007-12-24T09:35:00.000+01:00

Cómo tornear un punteru

2007-12-20T17:05:00.000+01:00

Dacuando, barrunto que YouTube ye un pozu ensin fondu, siempre qu'eches una güeyada, siempre alcuentres daqué interesante, cuasi nunca ye lo que tabes buscando pero esi ye otru telar...
Güei alcontramos esti interesante video qu'amuesa el torneáu d'un punteru de gaita gallega y con un fondu musical bien prestosu.
L'autor tamién colgó otru video asemeyáu dedicáu a la zanfona y un perguapu cantu de seitura d'un grupu gallegu que nun conozo (mea culpa) pero que me prestó pola vida oyir.

Lúnasa tocando repertoriu asturianu

2007-12-17T18:59:00.000+01:00

Faciendo país.

Músiques céltiques de Nadal

2007-12-16T17:31:00.001+01:00

Los villancicos, como parte de la música tradicional, nun son ayenos a los músicos folkies y, a poco qu'andemos a la gueta vamos alcontrar una bona ristra de referencies dedicaes a tan popular variedá musical.
El sellu Windham Hill llegó a sacar nun sé cuántos cd's embaxo'l títulu de Celtic Christmas per onde s'asomaben tolos grupos de la casa y allegaos siendo, de xuru, el mayor ésitu comercial d'una de les discográfiques bandera de la new age.
Pero la querencia pola música nadaliega nun ye esclusiva de la música new age, ye daqué abondo más común y nun fae falta muncho buscar p'alcontranos grandes nomes de la escena tradicional faciendo discos de villancicos, a veces buscando l'oportunismu comercial d'estes feches, a veces produciendo discos de gran calidá.
El discu clásicu de los clásicos d'esti xéneru ye Bells of Dublin de los Chieftains acompañaos por una montonera de collacios, personalmente camiento que ye'l más prestosu de los que conozo. El lider d'esti míticu grupu, Paddy Moloney, tamién tien nel mercáu discu nadaliegu de so Silent Night-Christmas in Rome onde s'acompaña pola Orquesta'l Vaticano. Otros nomes perconocíos del folk irlandés que podemos alcontrar en discos d'esta mena son Frankie Gavin y el so Shamrocks and Holly o Anuna con Winter Songs.
Esti añu alcontramos otru nome míticu del folk célticu con discu de villancicos nel mercáu, esti añu son Boys Of The Lough los qu'asoleyen Midwinter Live tamién cola Navidá como telón de fondu.
Equí nes orielles del mar Cantábricu tamién podemos apurrir los nueso propios exemplos, asina, nun hai que viaxar muncho nel tiempu pa rescatar Arbol de Navidá de Nuberu n'Asturies y, na vecina Cantabria, anguaño ta cellebrándose una serie de conciertos dedicaos a la música d'estes fiestes protagonizaos por Marcos Bárcena, Chema Murillo y Maribel Fernández (nos enllaces de la drecha podéis alcontrar el so MySpace).

Raglan Road por Mark Knopfler y collacios

2007-12-16T11:18:00.000+01:00

Los collacios de tito Mark son: Donal Lunny, Liam O'Flynn y Sean Keane.

Gaita globalizada: Xapón vía Arxentina

2007-12-16T10:57:00.000+01:00

Una intérprete de charango xaponesa yá ye una cosa bien llamativa pero ye que, Mari Sano, nel so grupu amás de charangos y instrumentos sudamericanos tamién mete una gaita asturiana!

El gaiteru qu'acompaña a Mari Sano ye un arxentín de raigañu astur llamáu Diego Hernán Tuero. Tenéis qu'esperar unos minutinos pa qu'apareza la gaita pero paga la pena.

Gaita globalizada: Nueva York

2007-12-16T10:50:00.000+01:00

Esta vuelta alcontramos la gaita na Pace University del estáu de Nueva York.

Gaita globalizada: Dakota del Norte

2007-12-14T13:08:00.000+01:00

Unos chavales de la North Dakota State University faciendo una versión d'El Xarreru y a la gaita asturiana.

Nuevos aires con Lucas V

2007-12-14T10:56:00.000+01:00

Ta a piques de salir a la venta'l primer trabayu discográficu de Lucas V, xuntaza de Xel Pereda y Nacho Vegas centrada nel romanceru asturianu. El prósimu sábadu día 15 tarán d'estrena nel Teatru la Llaboral de Xixón, acompañaos por músicos como Chus Naves, Luis Rodríguez y Manu Molina.
El proyeutu musical Lucas V trata d'abordar el cancioneru tradicional dende una persteutiva nueva dafecho, nel arniu del rock atormentáu.

Premios de la Música: Meyor Cantar n'Asturianu

2007-12-12T12:14:00.000+01:00

Estos son los candidatos d'esti añu al Meyor Cantar n'Asturianu:

L'Escaecíu, interpretáu por Na Zona y compuestu por Daniel Alonso.
La música nun va parar, interpretáu y compuestu por Skama La Rede.
Morenina de Caldones, interpretáu y compuestu por Carlos Rubiera.
Rutines, interpretáu por Blima y compuestu por Marcos G. Alonso.
Seique non, interpretáu por Tejedor y compuestu por Javi Tejedor/Ruma Barbero.
Ser humanu, interpretáu por Skanda y compuestu por Ana de la Fuente/José Manuel Fueyo/Marco Antonio Castañón.
Soncai, interpretáu por Soncai Sound System y compuestu por Sergio Rodríguez/Vito Álvarez/Xandru Fernández.
Vaqueiradas del maltratu, interpretáu y compuestu por Rafa Lorenzo.

El discu de Carlos Rubiera Asturianaes tamién ye candidatu al premiu Meyor Discu de Música Tradicional.

Foru sobre la construcción de gaites

2007-12-12T11:05:00.001+01:00

L'artesán norteamericanu Seth Hamon ta acabante de poner tola so esperiencia (bona parte d'ella) na construcción de gaites a disposición de toos nosotros.
Seth acaba d'asoleyar un foru sobre como facer gaites n'internet, la URL del mesmu ye http://makingandplayingbagpipes.theiforum.com/ . Nél alcontramos información y planos pa facer gaites escoceses (grandes y pequeñes), uilleanns, sackpipas suecas... Entá nun hai denguna entrada sobre gaites asturianes pero habrá, de xuru.
Tolos artesanos amateur tan de norabona, la información qu'apurre esti foru va se-ys granible a poco que se defendan col inglés.

Paddy Keenan, tamién de chigres...

2007-12-12T10:44:00.000+01:00

The Lonesome Boat por Paddy Keenan nel Dublin Pub de Moscú.

John MacSherry de session en Belfast

2007-12-11T11:12:00.000+01:00

Equí alcontramos a un vieyu collaciu dando muestres del so talentu nuna session nel Kitchen Bar de Belfast. La calidá d'imaxe podía ser meyor pero recordái que ta grabáu nun chigre...

Ozan Trío nes Músiques del Sieglu XX de Caxastur

2007-12-10T14:09:00.000+01:00

Armel an Hejer, Bernard Bizien y Malo Carvou formen l'Ozan Trio, grupu bretón que nos visitará esta selmana de la man de los conciertos de Músiques del Sieglu XX entamaos por Caxastur.
Ozan Trio fusiona la música tradicional bretona con múltiples influencies d'otres músiques de raigañu (swing, klezmer, cíngara...), que-y dan un aire nuevu enllén d'orixinalidá y frescor a la música pel país vecín.
El conciertu ye esti xueves, 13 d'Avientu, en Xixón, nel Centru Cultural Caxastur Colexata San Xuan Bautista, a les 20:00.
Más info:
http://www.ozan-trio.com/

Polka Asturiana dende Polonia

2007-12-10T13:09:00.000+01:00

Música asturiana dende Polonia, una polka del repertoriu del grupu avilesín Xéliba , como bien nos apuntó Xelu, son coses bien prestoses de la globalización...

Novedaes Discográfiques

2007-12-10T11:06:00.000+01:00

Estes son les novedaes discográfiques, les novedaes de la mio coleición personal de música.
La primera si que lo ye con toles de la llei porque el discu Tutu Studiu 07 ta acabante de salir al mercáu dende L'Aguañaz/Ámbitu (que tamién presenten agora el discu de Dulcámara y el de Blima). Esti discu, de Sergio Rodríguez, presenta una fusión de la música elletrónica y la folk que nun ye mui frecuente per estes llatitúes y amuesa la capacidá de Sergio remanando l'estudiu de grabación como un instrumentu más. Yo nun soi mui fan d'esta mena de fusiones (nun soi fan d'AfroCelt Sound System, Peat Bog Faeries...) pero reconozo que ye un discu interesante y nun resulta mui machacón.
Los otros dos son menos novedá, ún yá lleva más d'un añu nel mercáu (diba poner nes tiendes, pero yá nun esisten), pero aproveché'l pasu per Avilés de los hermanos Tickell pa mercalos. El primeru y más nuevu ye Instrumental de la Kathryn Tickell Band y l'otru ye Strange but True, que ye del 2006 y onde alcontramos a Kathryn acompañada esta vuelta con dellos collacios de los que foi faciendo a lo llargo de la so carrera (Rory Campbell, Anxo Lorenzo, Catriona MacDonald, Folkestra, Pipelines...). Instrumental ye la imaxe más clásica de la gaitera y lo más asemeyáu a lo que pue ser ún de los sos conciertos, Strange but True ye un trabayu más personal onde los planteamientos son un puquitín más arriesgaos. Y nos dos discos hai una píldora de música d'Asturies y Galicia, n'Instrumental alcontramos la Muñeira d'Antón de Xuacu y en Strange but True ta la gaita d'Anxo Lorenzo nel corte tituláu Splish Splash.

Llibru recomendáu

2007-12-09T12:57:00.000+01:00

Amás de folk prestaríame tratar equí otres coses rellacionaes cola música tradicional como, por exemplu, la luthería. Poro, equí vos presento esti llibru bien prestosu sobre dicha tema Making Wood Folk Instruments de Dennis Waring.
L'autor amuesa de forma bien afayaíza cómo facer dende los instrumentos más cenciellos (ocarines, caxes de ritmu...) fasta otros más complexos(vigulinos, harpes, banyos...). Desplicando los materiales y les ferramientes necesarios pa cada proyeutu, amás de la construción pasu ente pasu del instrumentu.
El llibru ye abondo vieyu, ta asoleyáu en 1979, pero pue mercase n'Ebay (que ye onde lo atope yo). Si queréis probar en llibreríes l'ISBN ye 0-8069-7482-6.
Si dalguna vez quixisti daprender a facer instrumentos esti ye'l to llibru, nun lo dubies.

Folkenon?

2007-12-09T12:04:00.000+01:00

Güei, 9 d'avientu, ñaz Folkesí un blog dedicáu a la música folk y de raigañu nel que diré publicando entraes cola mio propia visión de la escena folkie d'Asturies y dellos temes rellacionaos (más o menos).
El nome del blog ye un poco tontu, Folkesí, pero nun se m'ocurrió otra cosa al cubrir el formulariu. Perdonái la falta d'orixinalidá, pero ye domingo pela mañana. Dirá meyorando col tiempu, naguo por ello ;)